يقولون لي ضاقت وأنا أقول مفروجه

يقولون لي ضاقت وأنا أقول مفروجه
وعندي يقين إن الله اللي يفرجها

خيول الامل عندي على طول مسروجه
ونفسي تفاؤلها مع الناس يبهجها

لو أن الزمن قاسي والاوضاع محروجه
عسى الله علينا ما يضيق مخارجها

لقيت الصبر ينفع مع الضيق منتوجه
بصبر عليها بالمساير وأدرجها

وابـنهج دروب دوم بالطيب منهوجه
دروب النشامى اللي على العز منهجها

اداريك يارآسي عن الميل والعوجه

ماأبي الناس لاشافتك تكثر لجالجها

يارآسي تسامى واترك اللاش وهروجه
مادام انك دروب الفخرتسلك أبلجها

فضا الله وسع لسالكه واسلك فجوجه
هو اللي لخير الخلق سهّـل معارجها

انا خابرك ماتقبل علوم ممجوجه
تنقى خيار السالفة قبل تهرجها

توكل على ربك ولو ضاع مفروجه
هو اللي يضيقها هو اللي يفرجها