قصيدة ساخرة بعنوان العيب فينا ولا فى مين ...

قصيدة ساخرة بعنوان
العيب فينا ولا فى مين ...؟

العيب فى مين العيب فى مين
العيب فينا ولا فى مين
العيب فينا ولا فى ناس تانيين
العيب فينا ولا حكومة ناس تايهين
العيب فينا ولا فى ظلم البنى آدمين
ولا يكونش الواد حسانين
يعنى إكمنه خلف واد وإتنين
ولاجل العزوة خلف واد وكمان بنتين
وعشان يبجا صعيدى وزين
زوَّد تانى عليهم إتنين
طب وساعتها هياكلوا منين
جالَّك ما أنا فايت جِراطين
واحد جِبلى وواحد فين
حدا حتة حسن أبو عوضين
والدار واسعة وع الطين
والست حرمنا حلوة وزين
والصحة شديدة وجامدين
وحدانا بهيمة وإتنين
والبجرة حِداها عِجلين
والخير مالى دار حسانين
يبجى هخاف أنى كدة من مين
من البجرة ولا العجلين ..

****

ولا العيب فى مدام إجلال
قالت أوف زهقت حلال
مدت بوزها
وراحت زنت فى ودان جوزها
يا بيه يا أبو العيال
نفسى فى مرة يكون لى المال
زى جارتنا الست منال
جوزها حرامى فى بنك وقال
إن القرش يجيب أبو قرش
وإن الخمسة تجيب من اللحمة تلال
نفسنا مرة نشوف اللحمة
أو يوم حتى نسيب الزحمة
ونجيب جبنة من البقال
يلا يا راجل قوم من النوم
هات لعيالك قوت ورسوم
تمد إيديك .. تسرق .. تنهب
ترجع تبقى عال العال
ويبقى فى جيبك قرش ومال
يبقى العيب فى مدام إجلال
ولا العيب فى جارتها منال

*****

ولا العيب فى الحاج أمين
يوم ما رفض عريس وأتنين
كانوا جايين لبناته الأتنين
وادى هناء وادى شرين
بقوا الأتنين فى البيت بايرين
كله عشان الحاج أمين
جاله عريس قيمة وزين
لكن قفشة الحاجه أمين
ها يا حمادة شغال فين
عندك شقة وحلوة وفين
هتجيب شبكة بكام ومنين
كل دة يبقى فى غمضة عين
نقرا الفاتحة ولا الضاليين
ولا نقول دة كلام مجانين
انا يدوب عاطل وبدوَّر
وعشان أبقا عليك ما بحوَّر
سيبنى يدوب يجى سنتين
وأنا هاجى اقولك شغال فين
وهنبدأ تانى فى سنتين
وفى سنتيتن وكمان سنتين
راح أجيب دبلة وغويشتين
وأخطب بنتك يجى سنتين
وفى سنتين وكمان سنتين
يمكن أقولك شقتى فين
قام طرده الحاج أمين
وقاله يا ابن المجانين
اوعى تكلم بنتى شرين
أحسن أقطع منك يجى رطلين
يبقى العيب فى حمادة يا ناس
ولا العيب فى الحاج أمين

****

[code][quote]

قصيدة رائعة بس الى عايز اعرفة مين هو الحاج امين دة